Turkiyaning amaldagi prezidenti Rajab Toyyib Erdog‘an saylovga 5 kun qolganida 700 ming davlat xizmatchisining maoshlari 45 foizga oshirilishini ma’lum qildi.

Turkiya prezidenti ishtirokida mamlakat hukumati va kasaba uyushmalari o‘rtasida jamoaviy mehnat shartlari bo‘yicha tegishli protokol imzolandi.

«2023-2024 yillarda eng kam ish haqqi miqdori oshadi. Ushbu kelishuv doirasida biz mukofot olmagan xodimlar uchun 4-6 foizlik ustama ham joriy qilmoqdamiz. Terrorizmdan jabr ko‘rgan faxriylar yoki qurbonlarning oila a’zolariga 10 foizlik ustama to‘lanadi. Qo‘shimcha ish haqini 70 foizga oshirishni ham rejalashtirganmiz», – deydi Erdog‘an.

Shuningdek, Erdog‘an tungi smenalarda ishlovchi ishchilarning oylik miqdori ham 8 foizga oshishini qo‘shimcha qilgan.

Ushbu o‘zgarishlar 14 may kuniga belgilangan saylovlarga 5 kun qolganida sodir bo‘ldi.

Ma’lumot uchun, amalga oshirilgan so‘rovlarga ko‘ra, hozirda Erdog‘an va uning muxolifatdagi raqibi Kamol Qilichdaro‘g‘lining reytinglari taxminan bir xil.