Zamonaviy Raqamli texnologiyalar o‘quv markazi ochildi (foto)
Toshkentdagi Dasturiy mahsulotlar va axborot texnologiyalari texnologik parkida Koreya Respublikasining Milliy axborot agentligi jamiyati (NIA) bilan hamkorlikda Raqamli texnologiyalar o‘quv markazining ochilish marosimi bo‘lib o‘tdi.
Raqamli texnologiyalar o‘quv markazining ochilish marosimida Axborot texnologiyalari va kommunikatsiyalarini rivojlantirish vaziri Sherzod Shermatov qatnashdi.
Soha rahbari bugungi kunda Koreya Respublikasi bilan keng qamrovli ikki tomonlama hamkorlik aloqalari o‘rnatilganligini, boshqa sohalar kabi axborot-kommunikatsiya texnologiyalari yo‘nalishida ham ishlar jadal su’ratlarda olib borilayotganligini, mazkur Raqamli texnologiyalar o‘quv markazining ochilishi ham ana shunday hamkorlikning samarasi ekanligini ta’kidladi.
Ma’lumot uchun, O‘zbekiston Respublikasi Axborot texnologiyalari va kommunikatsiyalarini rivojlantirish vazirligi va Koreya Respublikasining Davlat boshqaruvi va xavfsizlik vazirligi o‘rtasida Seul shahrida elektron hukumatni yanada rivojlantirish bo‘yicha hamkorlik to‘g‘risidagi o‘zaro Anglashuv memorandum imzolangan.
Mazkur memorandum doirasida Koreya Respublikasining Milliy axborot agentligi jamiyati (NIA) bilan birgalikda IT-Parkning Toshkent, Samarqand, Urganch va Nukus shaharlaridagi IT- markazlarida Raqamli texnologiyalar o‘quv markazlari tashkil etilmoqda.
Ushbu markazlar zamonaviy texnologiyalarga asoslangan va ilg‘or usullardan foydalangan holda o‘quv jarayonlarni tashkil etish maqsadida zarur jihozlar va kompyuter uskunalar, ya’ni noutbuk, interaktiv doskalar, multimediya proyektorlar, printerlar va boshqa qo‘shimcha jihozlar bilan ta’minlanmoqda.
Zamonaviy texnik uskunalar bilan jihozlangan markazning o‘quv va amaliy mashg‘ulot xonalari yoshlarga axborot texnologiyalari yordamida yangi bilimlarni o‘zlashtirish va bu sohada o‘z salohiyatini namoyon qilish imkonini beradi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter