Toshkent Irrigatsiya va qishloq xo‘jaligini mexanizatsiyalash muhandislari institutida respublikada birinchi bo‘lib bakalavr bitiruvchisiga QR kodli V № 00000001 raqamli elektron diplom berildi. Bu haqda institut matbuot xizmati rahbari Rahimboy Jumaniyozov xabar bermoqda.

Qayd etilishicha, pandemiya sharoitidan kelib chiqqan holda institutda o‘tkazilgan «Bitiruvchi — 2020» onlayn tadbirida yuqori kayfiyat, ko‘tarinki ruh hukmronlik qildi.

2019-2020 o‘quv yilida institut bitiruvchilari uchun tashkil etilgan onlayn tadbirda barcha bitiruvchilar qatori ularning ota-onalari ham kuzatib borishdi.

«Bitiruvchi — 2020» onlayn tadbiri ZOOM platformasi orqali amalga oshirildi. 17 iyul kuni soat 11.00.da boshlangan onlayn-tadbirda rektor O‘ktam Umurzoqov mustaqil hayotga qadam qo‘yayotgan bitiruvchilarni samimiy tabrikladi.

Bakalavr diplomining yangi shakli QR kodli diplom berish yo‘lga qo‘yilgani va respublikada birinchi bo‘lib QR kodli V № 00000001 raqamli diplom  ushbu institut bitiruvchisiga berilgani alohida e’tirof etildi.