Yengil vaznda UFC chempioni Habib Nurmagomedov bir jang orqali rekord darajada pul ishlab olishga yaqin turibdi. 24-oktyabr, shanba kuni Abu-Dabidagi «Jangchilar oroli»da Habib Nurmagomedov — Jastin Getji jangi gonorari qancha bo‘lishini «MK-Sport» hisoblab chiqdi.

UFC hech bir jangning qancha pul keltirishini hech qachon ochiqlamaydi. Buning ustiga, hisob-kitob jangdan so‘ng o‘tkaziladi: translyasiyalar qancha pul keltirgani, eng yaxshi janglar uchun bonuslar va h.k.

Biroq Habib Nurmagomedov – Jastin Getji jangi gonorarlari haqidagi ma’lumotlar oldindan deyarli oshkor bo‘lib ulgurdi. Rossiyalik promouter Kamil Gadjiyev taxminiga ko‘ra, Habib bu jangda faoliyati davomida ishlagan barcha pullardan ko‘prog‘ini topadi:

«Gonorari fanatlar bazasi kengayishiga mos o‘ssa kerak. O‘tgan jangiga nisbatan ikki baravar ko‘p ishlashi ehtimoldan xoli emas».

Habib Nurmagomedov o‘tgan safargi jangida (Dastin Porega qarshi) promoushn uchun rekord ko‘rsatkich — 6 mln. dollar ishlagandi. Ikki yil avval, Konor Makgregorga qarshi jangda 2 mln. dollar ishlagan, biroq maydon tashqarisidagi janjali uchun 500 mingini jarimaga ushlab qolishgan.

Nurmagomedov 2012-yili UFC dagi debyuti uchun 16 ming dollar olgan. Keyin, jangdan-jangga daromadi oshib bordi. Getjiga qarshi jangi esa aralash janglar tarixiga rekord bo‘lib yozilishi mumkin: Habib 12 million dollar olishi mumkin!

Jurnalistlarga ma’lum bo‘lishicha, Habibning kafolatlangan gonorari 8 milliondan kam bo‘lmaydi, Getjiniki esa 5 million dollar. Bunga PPV dan foizlar va mukofot pullari ham qo‘shilsa umumiy gonorar 18 million dollarga yetadi, shundan 12 millioni Nurmagomedovga tegadi, deyiladi xabarda.