«Choyxona musica» spektakli prodyuseri o‘zbekistonlik Tavakkal Sultonov Eronning Hamadon shahrida bo‘lib o‘tayotgan 29-Xalqaro bolalar va o‘smirlar teatr festivalida ishtirok etyapti.

Festivalning milliy teatrlar yo‘nalishi ishtirokchisi bo‘lgan T.Sultonov tadbir taassurotlari haqida mahalliy «Mehr» axborot agentligiga intervyu berdi.

«Garchi Hamadon shahri mezbonlik qilayotgan 29-Xalqaro bolalar va o‘smirlar teatr festivalida birinchi marta ishtirok etayotgan bo‘lsamda, xoh spektakl ijrosi, xoh qisqa safarim davomida bo‘lsin mahalliy aholi tomonidan o‘ziga xos ishtiyoq bilan kutib olinganim meni hayratda qoldirdi», – deydi o‘zbekistonlik teatr ustasi.

Sultonov mazkur festivalda namoyish qilinayotgan spektakllar sifati to‘g‘risida ham to‘xtalib, ularning sifat jihatidan lol qildirgani hamda juda yuqori ishlangan asarlarga guvoh bo‘lganini aytadi.

«Men uchun g‘aroyib va qimmatli bir tajriba bo‘ldi hamda tomoshabinlar tomonidan ko‘rsatilgan iliq munosabatlar doimiy ravishda bizga hamrohlik qildi. Sahna ishlarini tomoshabinlar his-tuyg‘ulari bilan uyg‘unlashtirish, ular bilan tanishish va spektakl davomida olingan his-tuyg‘ularni ifodalash men va mening guruhim uchun takrorlanmas tajriba bo‘ldi», – deydi Sultonov.

Tavakkal Sultonov, shu bilan birga, ushbu festivalda ishtirok etayotganidan xursand ekanini yashirmaydi.

«Qozog‘iston, Rossiya va Turkiya singari davlatlardagi turli xil festivallardan to‘plagan boy tajribamga qaramasdan, ikkilanmasdan ayta olamanki, mazkur festival juda yuqori darajada tashkil etilgan. Biz bu festivalda ishtirok etayotganimizdan faxrlanamiz va ushbu festivalda ishtirok etish sharafi bizga muyassar bo‘lganligidan ham juda xursandmiz. Va so‘zim oxirida shuni aytmoqchiman, Hamadon xalqining mehmondo‘stligi va bag‘rikengligidan juda ham lazzatlandik. Hamadon shahridagi 29-Xalqaro bolalar va o‘smirlar teatr festivali biz uchun unitilmas xotiraga aylandi», – deydi o‘zbekistonlik teatr ustasi.