Huquqiy cheklov choralari qo‘llanmagan fuqaroning chetga chiqishida muammo bormi? Albatta, yo‘q. Faqat belgilangan tartibga binoan hujjat rasmiylashtirsa, kifoya, u yog‘iga — oq yo‘l: oy borib, omon keling!

Bilasiz, mamlakatimiz fuqarolarning xorijga chiqishi masalasida qator o‘zgarishlar ro‘y berdi, bu jarayondagi ortiqcha ovoragarchiliklarga barham berilmoqda. Shunga qaramay, tegishli tartiblardan «sakrab o‘tib», chetga chiqayotganlar uchrab turibdi-da. Xuddiki, shahar bedarvozadek.

Botir Bo‘riyev (ismi-sharifi o‘zgartirildi) chetga chiqishning «oson yo‘li»ni topgandek edi go‘yo. Ya’niki, xorijga chiqish uchun biometrik pasportini rasmiylashtirmasdan, avvaliga Ukrainaga uchdi, u yerdan Turkiyaga. Bor-yo‘g‘i to‘qqiz kunlik safari yurtga qaytgach, o‘ziga qimmatga tushishini bilmasmidi?!

Xullas, u «Istanbul-Toshkent» yo‘nalishidagi NU-272-sonli aviareys bilan uchib kelgach, Islom Karimov nomidagi Toshkent xalqaro aeroportida chegara nazorati divizioni xodimlari tomonidan to‘xtatildi: okasi, chetga qonunga xilof ravishda chiqibsiz-ku?! Buning oqibati nima bo‘lishini bilasizmi?

Natijada unga nisbatan O‘zbekiston Respublikasi JKning 223-moddasi 1-qismi bilan jinoyat ishi qo‘zg‘atilib, ish sudga oshirildi.

O‘qilgan qonuniy hukmdan tegishli xulosa chiqarib olsa kerak. Yana qaydam...

J.Najimov