2020-yil 18-oktyabr kuni soat 15:00 da Andijon viloyati, Baliqchi tumani, Afsona MFY hududidan o‘tgan Baliqchi-O‘rmonbek avtomobil yo‘lida aynchli yo‘l-transport hodisasi sodir bo‘ldi.

IIV huzuridagi Tergov departamenti xabariga ko‘ra, 40 yoshli F.X. «Nexia» rusumli avtomashinasida O‘rmonbek yo‘nalishida harakatlanib borayotganida qarama-qarshi yo‘nalishga chiqib ketib, qarshisidan kelayotgan 53 yoshli A.O‘. boshqaruvidagi «Nexia» rusumli avtomashinasi bilan to‘qnashuv sodir etgan.

Natijada haydovchi F.X. va yo‘lovchi 53-yoshli J.M. hodisa joyida vafot etgan. Har ikkila avtomashinadagi yana 3 nafar yo‘lovchi va boshqa bir haydovchi turli ko‘rinishdagi tan jarohatlari olib, kasalxonaga murojaat qilishgan.

Mazkur holat yuzasidan Baliqchi tumani IIB huzuridagi Tergov bo‘linmasi tomonidan O‘zbekiston Respublikasi Jinoyat kodeksining 266-moddasi 3-qismi «a» bandi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Tergov harakatlari olib borilmoqda.