Владимир Зеленский Россия Беларусдаги ҳарбий машғулотлар ниқоби остида, тафсилотларни ошкор қилмасдан, «бирон нарса тайёрлаётгани»ни иддао қилди. Бу ҳақда Украина раҳбари онлайн тарзда Варшавада бўлиб ўтган «Уч денгиз ташаббуси» саммитида таъкидлаб ўтган.

«Одатда янги ҳужумлар шундай бошланади. Қандай бўлади – билмадим. Украина? Литва? Польша? Худо кўрсатмасин! Лекин ҳаммамиз тайёр бўлишимиз керак. Ҳамкорлик учун барча тузилмаларимиз очиқ»,  – дея қўшимча қилди у.

У, шунингдек, Ғарб етакчиларини Путинни Украинада узоқ муддатли оташкесимга рози бўлишга мажбурлаш учун Кремлга босимни кучайтиришга чақирди.

«Биз ҳаммамиз бу уруш адолатли, хусусан, Украина ўз ерларининг бир қаричини ҳам йўқотмасдан ҳамда Путин учун ҳеч қандай мукофотларсиз якунланишини хоҳлаймиз», – дейди Зеленский.

Болтиқбўйи, Қора ва Адриатик денгизлари яқинида жойлашган Европа Иттифоқининг 12 давлатини бирлаштирган «Уч денгиз» юбилей саммитидан сўнг иштирокчи давлатлар Россиянинг Украинага қарши урушини қоралаб, қўшма баёнот қабул қилди. Давлат раҳбарлари, шунингдек, Украина ва Молдованинг Европа Иттифоқига қўшилиш жараёнини тезлаштиришга чақирди.

Маълумот учун, йил бошида Москва ва Минск сентябрь ойида қўшма ҳарбий машғулотлар ўтказишини маълум қилган эди. Турли ҳисоб-китобларга кўра, бу тадбирга 100 минггача ҳарбий хизматчилар жалб қилиниши мумкин.

Бунга жавобан Польша Мудофаа вазирлиги Варшава НАТО билан биргаликда кенг кўламли машғулотлар ўтказиш ниятида эканлигини маълум қилди.

Шу билан бирга, Германиянинг Гамбург шаҳрида кузда Россиянинг НАТО давлатларига потенциал ҳужумини тақлид қилувчи кенг кўламли машқлар режалаштирилган. Бу Ғарб иттифоқдош кучларини шарқий қанотда тезкор жойлаштиришни талаб қилади.

Ўз навбатида, Россия раҳбарияти НАТО Россия чегаралари яқинида кетма-кет иккинчи йил машғулотлар ўтказаётганидан норози. Россия Хавфсизлик Кенгашининг собиқ раҳбари Николай Патрушев НАТО давлатлари гўёки Калининград вилоятини эгаллаб олиш ва ядро арсеналларига профилактик зарбалар бериш билан боғлиқ сценарийларни ишлаб чиқаётганини иддао қилган.