Бухоро вилояти Ғиждувон туманида фуқаро А.Б. Фуқаролик ишлари бўйича Ғиждувон туманлараро судининг 2024 йил 26 июндаги ижро варақасига кўра, «Давр банк» ХАТБ Олмазор филиали фойдасига 411 млн 474,2 минг сўм кредит қарздорлигини қоплаши керак бўлган.

Бироқ, у қарздорликни қопламай, ҳатто, ўзига тегишли бўлган шахсий автомашинаси – «Kia sportage» борлигини ҳам яшириб юрган. Қарздорга нисбатан олиб борилган ижро ҳаракатлари давомида «МИБ Портал» дастури ёрдамида қарздор номида бўлган барча мол-мулкларга таъқиқ қўйилган. Ва А.Б. номида автотранспорт воситаси ҳам мавжудлиги аниқланган. Қидирувга берилган «Kia sportage» туман ҳудудидан топилиб, тегишли тартибда вақтинча сақлаш учун жарима майдончасига жойлаштирилган.

«Тижорат банкларидан олинган кредитлар шартномада белгиланган тартибда қайтарилмаган тақдирда, кредитлар суд тартибида ундирилиши ва ундирув қарздорнинг мол-мулкларига қаратилиши мумкин. Қарздорга тегишли «Kia sportage»  сотиш учун аукцион савдоларига чиқарилиши ҳақида расман огоҳлантирилди. Ҳозирда, ижро ҳаракатлари олиб борилмоқда», – деди бу ҳақда «Xabar.uz»га маълум қилган МИБнинг Бухоро вилояти бошқармаси жамоатчилик билан алоқалар ва ҳуқуқий ахборот бўйича катта инспектори Ихтиёр Олимов.