Қатардаги жаҳон чемпионатининг F гуруҳида 2-тур доирасида Белгия ва Марокаш ўзаро куч синашди. «Ал-Тумама» стадионида ўтган ўйинда марокашликлар ғалаба қозонишди.

Ўйиннинг биринчи бўлими 45+2-дақиқасида Марокаш яримҳимоячиси Ҳаким Зиеш киритган гол бекор қилинди. Учрашув бош ҳаками Сесар Артуро Рамос VAR ни кўриб шундай қарор чиқарди.

Иккинчи бўлимнинг 73-дақиқасида Марокаш ниҳоят ҳисобни очди. Жарима тўпини яримҳимоячи Абдулҳамид Собирий аниқ амалга оширди. 90+2-дақиқада эса Закариё Абуҳлал ўйинга нуқта қўшди.

ҚАТАР-2022. F ГУРУҲИ. 2-ТУР

Белгия — Марокаш — 0:2

Голлар: Абдулҳамид Собирий (73),  Закариё Абуҳлал (90+2).

Ғалабадан сўнг Марокаш F гуруҳи етакчисига айланди (4 очко), Бельгия иккинчи ўринга тушди (3).

1 декабр куни учинчи тур доирасида марокашликлар канадаликларга қарши тўп суришади, белгияликлар эса шу куни хорватлар синовидан ўтишади: ҳар икки ўйин соат 20:00 да бошланади.

Бугун эса ушбу гуруҳнинг яна бир ўйинини кўрамиз: Канада — Хорватияга қарши. Ўйин соат 21:00 да бошланади.