Германия коронавирусга қарши кураш доирасида Ўзбекистонга тиббий кўмак беради. Бу ҳақда ГФРнинг юртимиздаги фавқулодда ва мухтор элчиси Гюнтер Оверфельд «Xabar.uz»га маълум қилди.

«Германия Ўзбекистон билан мамлакат мустақилликка эришгандан буён яқин ҳамкорлик алоқаларини ва дўстона муносабатларини мустаҳкамлаб келмоқда. Коронавирусга қарши курашда ҳам Ўзбекистон билан биргамиз ва бу синовни муваффақият билан енгиб ўтамиз. Ҳамкорликнинг яққол мисоли сифатида ўтган ҳафтада Ўзбекистоннинг Германия фуқароларини ўз юртига қайтаришдаги катта ёрдамини келтиришим мумкин. Германия ҳозирда Ўзбекистон учун зарур тиббий кўмак бериш масаласини кўриб чиқмоқда. Биз биргамиз, биз енгамиз!» – дейди элчи Гюнтер Оверфельд.

Айни пайтда бутун сайёрамизда коронавирусга қарши жиддий кураш кетмоқда. Жаҳон соғлиқни сақлаш ташкилоти жорий йил 11 март куни COVID-19 инфекцияси тарқалишини пандемия деб эълон қилди.

Германияда ҳам 62 мингдан зиёд киши ушбу инфекцияга чалинган, 541 киши ундан вафот этган. Мамлакат канцлери Ангела Меркель инфекция тарқалишини тўхтатиш бўйича федерал миқёсдаги чора-тадбирлар режасини эълон қилди.

Германия ҳукумати етакчиси ҳозирча коронавирусга қарши дори ва вакцина йўқлигини таъкидлаб, аҳолини гигиена қоидаларига риоя этиш ҳамда ўзаро мулоқотда масофа сақлашга даъват этган, соғлиқни сақлаш тизими вакилларини эса шай ҳолатда бўлишга ундаган.