Андроид қурилмалар учун Xabar.uz мобил иловаси. Юклаб олиш ×

Эркагу-аёллар уриб-тепиб ўлдиришда гумон қилинаётган ўқитувчи ҳақида

Эркагу-аёллар уриб-тепиб ўлдиришда гумон қилинаётган ўқитувчи ҳақида

Самарқанд шаҳрида бир гуруҳ йигитлар томонидан калтакланиши натижасида ўқитувчи вафот этгани ҳақида хабар бериб ўтилган эди. Ўзбекистон Республикаси ИИВ ҳузуридаги Тергов департаменти томонидан бу ҳақда батафсил маълумот берилди.

2019 йил 20 ноябр куни тахминан соат 02:00 ларда 28 ёшли фуқаро «Изатулло» ўзининг 30 ёшли таниши «Мақсуд» билан биргаликда Самарқанд шаҳар Буюк ипак йўли кўчасида жойлашган автобус бекати олдидан ўтиб кетаётган «Асал» исмли аёлга гап отишган. Бу вақтда Асалнинг ёнида бўлган 2 нафар эркак танишлари ушбу ҳолатга аралашиб, улардан бири Изатуллонинг юзига бир маротаба урган. Шунда Асал ўзининг танишига қўнғироқ қилиб уларни чақирган. Асалнинг чақирувига биноан жами 6 нафар шахслар келишган. Уларнинг ичида 2 нафари аёллар бўлган. Шундан сўнг улар бир гуруҳ бўлишиб, шу куни соат 03:40 ларда жамоат жойи ҳисобланган Самарқанд шаҳар Беруний кўчаси 82-уй олдида жамиятда юриш-туриш қоидасини қасддан менсимасдан фуқаро Изатуллонинг шериги Мақсудни сўкиб ҳақоратлаб, танасини турли жойларига қўл-оёқлари билан уриб-дўппослаб тан жароҳатлари етказишган.

Шундан сўнг 3 нафар аёл ва 3 нафар эркак шахслар қўл-оёқлари билан Изатуллонинг бош қисми ва танасининг турли соҳаларига бир неча маротаба уриб дўппослаб, оғир тан жароҳати етказишган.

Кўрилган тезкор чора тадбирлар натижасида Изатуллога нисбатан жиноятни содир этган шахслардан 3 нафари ички ишлар ходимлари томонидан ушланган. Тез тиббий ёрдам шифохонасининг бирламчи маълумотномасига кўра, Изатуллога «бош мия суякларини оғир синиши» ташхиси қўйилган.

Мазкур ҳолат юзасидан 2019 йил 20 ноябр куни Самарқанд шаҳар ИИО ФМБ ҳузуридаги тергов бўлими томонидан Ўзбекистон Республикаси Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.

2019 йил 23 ноябр куни Изатулло кўрсатилган тиббий муолажаларга қарамасдан шифохонада вафот этган ва шу куни унинг ўлим сабабини аниқлаш мақсадида судга оид тиббий экспертиза тайинланган ҳамда жиноят иши ЖКнинг 104-моддаси 3-қисми «д» бандига қайта малакаланган.

Дастлабки тергов жараёнида 3 нафар шахсга нисбатан Ўзбекистон Республикаси ЖКнинг 104-моддаси 3-қисми «д» банди ва 277-моддаси 2-қисми «б» банди билан айб эълон қилиниб, уларга нисбатан «қамоққа олиш» тарзидаги эҳтиёт чораси қўлланилган ва қолган 6 нафар гумон қилинувчиларга нисбатан тегишли эҳтиёт чораларини қўллаш масаласи кўрилмоқда.

Ҳозирда жиноят иши бўйича дастлабки тергов ҳаракатлари олиб борилмоқда ва натижасига кўра қонуний қарор қабул қилиниши таъминланади.

Аниқланишича марҳум И.М. 2016 йил 06 июн куни Мирзо Улуғбек номидаги Ўзбекистон Миллий университетини тамомлаб, 2016 йил 2 сентябр куни Самарқанд шаҳридаги 42-сонли умумтаълим мактабига ўқитувчи бўлиб ишга кириб, 2017 йил 25 сентябр куни ишдан бўшаган ва Россияга ишлаш учун кетиб, 2018 йил август ойида қайтиб келган.

2018 йил 3 сентябр куни яна шу мактабга ўқитувчи лавозимига ишга қабул қилинган, ҳамда ўқувчиларга рус тилида тарих фанидан дарс бериб келган. Жорий йилнинг 17 октябр кунидан буён ишдан бўшашлиги ҳақида мактаб директорини оғзаки огоҳлантирган ва мактабга ишга бормай, шу вақт мобайнида Самарқанд шаҳри Мирзо Улуғбек ва Шохрух кўчалари кесишувчи чорраҳасида сомса сотиш билан шуғулланган.

Ўзбекистон Республикаси ИИВ ҳузуридаги Тергов департаменти фуқаролардан мазкур ҳолатнинг барча тафсилотлари аниқланиб, тергов ҳаракатлари якунига етгунига қадар ижтимоий тармоқларда номақбул изоҳлар беришдан сақланишларини сўраймиз.

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг