Ўтган йилнинг июнь ойида Асакада тўққиз яшар қиз ўлдириб кетилгани  озмунча шов-шувга сабаб бўлмаганди?! Марҳума танасининг 18 жойидан пичоқ урилгани оқибатида вафот этганидан Андижон ларзага келганди.

Қоттиллик содир бўлганидан саноқли кунлар ўтиб,  жиноятни содир этган шахс қўлга олингани, у  марҳуманинг 23 ёшли қўшниси (аёл) бўлиб чиққани ҳақида  хабарлар тарқалди, ҳатто гумондорнинг суратлари ҳам тармоқларга чиқиб кетдики,  жамоатчилик бироз тин олгани рост. Бироқ иштибоҳ ҳам йўқ эмасди:  ёш жувон, боз икки яшар гўдакнинг онаси  шу даражада вахшийликка бориши мумкинми ўзи?

Орадан кўп ўтмай қамоққа олинган келиннинг яқинлари ижтимоий тармоқлар орқали мурожаат қилиб, аёл аслида айбсиз экани, орган ходимларининг қийноқлари натижасида йўқ жиноятни бўйнига олишга мажбур бўлганини билдиришди. Бироқ бундан натижа бўлмаганини қотилликда айбланаётган аёлнинг иши судга оширилгани айтиб турибди.

Судда эса... кутилмаган ҳол: аёл айнан қотиллик жинояти бўйича оқланди!  Айни маълумотни «Xabar.uz» манбаси тасдиқлади.

Дарҳақиқат, ҳолат каррасига кутилмаган эди.

Биринчидан,  ўз вақтида  «дело» вилоятдан олиниб, нақ Бош прокуратуранинг Ўта оғир жиноятларни тергов қилиш бошқармаси иш юритувига берилганди. Марказий маҳкамада малакали терговчилар фаолият юритишига шубҳа йўқ эди, рости. Бироқ мазкур жиноят иши бўйича уюм-уюм қовун туширлганини оқлов ҳукми  яққол кўрсатиб турибди.

Иккинчидан, қилмаган оғир жиноятни ҳеч қандай босимсиз бўйинига олиши учун одам жинни ёки тентак бўлиши лозим. Оқланган аёлнинг ақли расо эканми, демак, шўрлик «қотилликка  иқрор бўлиши учун» қийноққа солинганига шубҳа қилманг! Бу эса ўз-ўзидан ҳолат  жиддий ўрганилиши ва айбдорлар жазога тортилиши кераклигини англатади.

Учинчидан, нақ пойтахтда тергов қилинган  ва яна денг қотилликка оид «дело» бўйича бўйича вилоят судида оқлов ҳукми чиқиши яқин-яқингача эртак билан баробар эди.  Бугун вазият бошқачаки, бу судьянинг салоҳиятидан ташқари жасоратидан ҳам  дарак!

Ниҳоят, тўртинчидан,  аёлнинг оқланиши қотил бошқа экани, у катта эҳтимол билан ялло қилиб юрганини англатади. Оғир жиноятга қўл уриб, жавобгарликка тортилмай қолган кимса ялло қилиб юришига шубҳа қилмангки, жамият учун энг катта хавф шу, аслида?!